BUTUAN CITY – Igo na lang sa pagpasibaw sa ilang mga yangungo ang mga motorista ning siyudad subay sa gikatakda na usab nga bigtime oil price hike ugmang adlawa.
Sigon sa motoristang si Shiela, grabe na kataas ang isaka sa presyo sa gasolina ugmang adlawa rason nga ma-apektuhan na usab sila.
Girekolamo pa niini ang misaka na usab nga presyo sa mga nag-unang palaliton apan ang sweldo dinhi sa Butuan, padayong wala musaka hinungdan nga kutob lang sa 50-pesos ang iyang natubil karong adlawa.
Samtang gipadayag usab sa laing motorista nga si Ariel Sucorin kinsa namasada sa ilang barangay sa Nongnong padulong ning siyudad gamit ang skylab, nga ginagmay lang usab ang iyang ipatubil tungod sa kamahal na kaayo sa gasolina.
Alkansi usab sila sa biyahe tungod kay ang gitugot ra man nga iyang makarga, hangtud sa tulo lang ka mga pasahero nga muplite og tag-70 pesos.
Bisan pa man niini, padayon gihapon ang iyang biyahe samtang makaya pa tungod kay wala matud pa siya’y laing panginabuhian.
Samtang gipadayag usab sa iyang asawang si Julieta Sucorin nga mu-utong na sila sa kagamay lang sa ilang kitaon tungod kay wala matud pa’y laing pangita.
Bahala na matud pa ang mga pasaherong magdugang sa plitehan ilabina nga did-an sila sa mga pulis nga musobra sa tulo ka pasahero ang ilang kargada.
