BUTUAN CITY – Gi-anunsyo sa Department of Agriculture (DA) nga modawat og cash assistance ang mga mag-uuma ug mangingisda karung Abril tungod sa nasinatiang pagtaas presyo sa lana tungod sa krisis sa Middle East.
Sigon ni Director Lorna Belinda Calda sa DA, makadawat og P5,000 ang mga mags-uumang migamit og traktora samtang ang mga mangingisdang dunay motorized banca makakuha usab og P3,000.
Sumala sa DA nga duna silay P100 million pondo para saguton ang programa nga mapahimuslan sa anaa sa 14,400 nga mag-uuma og 15,669 mananagat.
Una niini dunay P10 billion nga pondo para sa 4.217 milyong benepisyaryo sa ilalom sa Presidential Assistance to Farmers and Fisherfolk nga ipagawas usab karung buwan sa Abril.
Makadawat usab og P3,200 ang matag mag-uuma gikan sa Rice Competitiveness Enhancement Funds sa ilalom sa Rice Farmers Financial Assistance (RFFA).
Alayon niini misaad usab ang Department of Social Welfare and Development (DSWD) nga motubag sa mga maapektuhang minimum wage earners ug middle class kung magpadayon ang krisis sa Hunyo ug Hulyo.
Sa karun ‘dili pa sila segurado sa sunod nga plano kung unsa nga sektor ang sunod nga makapahimulos apan andam matud pa ang ilang pondo.
Gisiguro usab sa Department of Budget and Management (DBM) nga dunay igong pondo ang gobyerno para mutubag sa epekto sa krisis sa Middle East ug mga kalamidad ilabina sa pagsugod sa ting-ulan sa buwan sa Hunyo.
