BUTUAN CITY – Gikagubtan karon sa publiko ilabina sa mga netizens ang isyu kalabot sa painting nga gihisgutan ni Ramil Madriaga nga iya matud pang giregalo kang Vice President Sara Duterte, human nagpagawas og pamahayag sa Dabawenyang artist nga si Tanya Gaisano Lee nga siya diay ang tinuod nga naghimo ug mipresenta sa maong artwork kang Duterte niadtong 2021, niadtong mayor pa kini sa Davao City.
Sumala sa artist, ang painting personal niya nga regalo kang Inday Sara dihang mayor pa siya sa Davao City kansa sukwahi sa gipasi-atab ni Madriaga nga iyang nadawat ang maong painting isip regalo gikan sa usa ka scholar sa Laguna, ug kini mao kuno ang makita sa mga screenshots sa gika-ingong mga video calls kaniadto.
Karon gikumpara sa mga netizens ang mga hulagway sa painting ug ang gi-ingong litrato ni Madriaga nga nagkupot niini, nga nakapukaw og diskusyon tungod sa klarong kalahi-an sa mga obra, nga maoy hinungdan sa kayagaw karon sa publiko kung kinsa ang tinuod nga gigikanan sa maong artwork.
