BUTUAN CITY – Nanawagan ang Association of Southeast Asian Nations (ASEAN) sa Estados Unidos ug Iran nga ipadayon ang negosasyon para sa pangmalahutayong kalinaw human sa kasabutang duha ka semanang hunong binuthanay.
Gidayeg usab sa ASEAN ang papel sa Pakistan ug uban pang panig sa pagduso sa kasabutan ug gipamugos ang kamahinungdanon sa diplomasya, pag-respetu sa international law, ug hinanaling paghunong sa giyera sa Middle East.
Gitumbok usab sa ASEAN ang seguridad ug gawasnong paglawig sa Strait of Hormuz.
Sumala ni Department of Foreign Affairs (DFA) Secretary Ma. Theresa Lazaro, gitun-an sa ASEAN ang pagmugna og crisis communication protocol aron paspas ang koordinasyon sa panahon sa krisis samtang gipakusgan usab ang kooperasyon sa enerhiya ug seguridad sa pagkaon sa rehiyon.
Samtang gipahayag usab ni US President Donald Trump nga ang ceasefire parte sa pagduso alang sa pangmalahutayong kasabutan sa kalinaw.
