BUTUAN CITY – Gipanawagan karon sa grupong BAN Toxics ang Food and Drug Administration ug ang Department of Trade and Industry nga pahugtan ang pagpatuman sa balaud batuk sa padayong pagkaykap sa mga delikadong plastic swimming floater toys sa merkado.
Ang panawagan base na sa alarming nga resulta sa ilang gihimong market monitoring sa mga merkado sa Metro Manila ug Tacloban City.
Migawas sa ilang pagsusi ang nagkada-iyang klase sa mga dulaang pangtubig sama sa mga swim rings, beach balls, ug swim vests— nga duna’y taas nga antas sa mga delikadong kemikal sama sa lead, mercury, ug cadmium.
Gawas sa presensya sa mga makahilong elemento, gibulgar usab sa grupo nga kadaghanan sa maong mga produkto, kulang sa saktong label o impormasyon alang sa mga mamalitay.
Ang kawala’y igong pahimangno ug detalye sa mga packaging, usa ka klarong paglapas sa mga sumbanan sa Republic Act No. 10620.
Giklaro usab sa BAN Toxics nga ang padayong pagpamaligya sa mga wala mupasar sa sumbanan sa mga produkto, maghatag og dakong kadaut sa panglawas sa publiko.
