BUTUAN CITY – Nagkinahanglan og mokabat sa P429 bilyon nga crisis fund ang gobyerno sa Pilipinas kung magpadayon pa hangtod katapusan sa tuig ang tensiyon sa Middle East, sumala sa Department of Economy, Planning and Development (DepDev).
Doble kini kumpara sa P238 bilyon nga una nang gibutyag sa Department of Budget and Management (DBM) nga gikinahanglan aron matubag ang epekto sa Iran war sa ekonomiya sa nasud.
Sumala kang DepDev Secretary Arsenio Balisacan, kung magpadayon pa ang tensiyon sa rehiyon sulod sa sunod unom ka bulan o gikan Hulyo hangtod Disyembre, mosaka pa ang panginahanglan sa resources ug kinahanglan nilang mangita og paagi aron kini matubag.
Gipunting usab niini ang pagbana-bana sa Unified Package for Livelihoods, Industry, Food and Transport (UNLIFT), diin mokabat sa P429 bilyon ang kinahanglan aron pondohan ang nagpadayon nga mga lakang alang sa upat ka kritikal nga sektor hangtod katapusan sa 2026, lakip ang agrikultura, transportasyon, enerhiya, ug ang mga Overseas Filipino Workers (OFWs).
Kung mahunong ang krisis hangtod Hunyo, gibutyag ni Balisacan nga posibleng mokabat lang sa P205.2 bilyon ang magamit alang sa emergency funds.
