BUTUAN CITY – Mag-atubang og dugang mga kaso ang mga piniriso kon Persons Deprived of Liberty kon (PDLs) nga subling nadakpan human ang pakyas nga jail break kagahapon sa alas-6:50 sa buntag sulod mismo sa district jail sa Lianga, Surigao del Sur.
Sa eksklusibong pakighinabi sa Bombo Radyo Butuan, gipadayag ni Jail Supt. Bernie Ruiz, assistant regional director for Operations sa Bureau of Jail, Management and Penology kon BJMP-Caraga, imbestigahan usab nila ang mga on-duty jail guards aron masayran kung duna ba sila’y tulubagon sa mang panghitabo taliwa nga wala pa hingpit nga nakagawas gikan mismo sa prisuhan ang mga binilanggo.
Madumdumang pasado sa alas-6:50 kagahapon sa buntag samtang nagrasyon og pagkaon ngadto sa mga piniriso ang ilang duty personnel, gisakyan kini sa mga pinirisong nagplanong musibat pinaagi sa paggawas sa secondary gate dayong hostage sa bantay gamit ang improvised ice pick.
Dihang nakita matud pa kini sa laing jail guard nga si PO1 Muñeza, nag-warning shot kini hangtud nga laing grupo sa mga piniriso ang mi-atake na usab sa duha ka mga jail guards nga na-assign sa main gate alang unta sa ila nang pagsibat.
Ang maong hitabo naghatag og komosyon nga gika-alarma sa uban pa nilang mga bantay labina niadtong anaa na-detail sa tower resulta sa natigayong pinusilay nga miresulta sa pagkamatay ang tulo ka mga PDLs nga mudunggab na unta kang JO1 Rey Rebuyon.
