BUTUAN CITY – Hangtud sa pagkutlo niini nga balita, wala pa’y lead ang kapulisan sa Claver, Surigao del Norte sa midagit sa usa ka mestisa Intsik nga batang babaye kagahapon sa buntag samtang padulong sa eskwelahan kagahapon sa alas-7:30 sa buntag sa Claver, Surigao del Norte.
Sa eksklusibong pakighinabi sa Bombo Radyo Butuan, gipadayag ni PMSgt Michelle Edra-Lareza sa Community Affairs Division-Police Non-Commissioned Office sa Claver Municipal Police Station, base sa ilang inisyal nga imbestigasyon, padulong unta sa eskwelahan ang biktima ka-uban ang 10-anyos niining maguwang nga gihatag og e-bike sa ilang 12-anyos usab nga uyuan.
Base sa kuha sa CCTV footage, gibabagan sa nagsunod kanilang lalaking nakamotorsiklo nga lalaki ang ilang dalan sa Magsaysay kanto Paqueo Barangay Bagakay, ug duna’y panag-istoryahanay tali sa wala pa mailang suspek ug sa maguwang sa bata hangtud nga nadala ang biktima nga wala’y natigayong komosyon.
Wala makatabang ang mga tawo sa palibot tungod kay wala man matud pa’y nangayo kanila og pakitabang.
Gani human nasayran sa maguwang sa biktima nga nawala na kini, dinhi na siya na-shock rason nga wala pa nila kini ma-istorya og tarong.
Hangtud karon, wala pa mi-contact sa mga ginikanan sa biktima ang iyang abductor.
Migawas usab sa imbestigasyon nga usa ka puro Chinese national ang amahan sa bata samtang pure Pinay usab ang inahan niini nga taga-Butuan City apan didto na nagpuyo sa Claver tungod sa ilang negosyo nga scrap-buying ug pagpaninda og mga cell phones.
