BUTUAN CITY – Gikatakdang ipailawom sa post mortem examination ang patay’ng lawas sa usa ka lalaking brutal nga gipatay sa gituohang New People’s army.
Pinaagi sa nahimong report ni Terisita Olmo Biyog hamtong ang pangidaron, residente sa Brgy. Camp Eduard, Alegria, Surigao del Norte ngadto sa Kitcharao municipal police station kalabut sa natigayong pagpamusil ning nakalabay’ng alas 6:00 sa gabie sa bukirang bahin sa Kabanikagan, Brgy. Hinimbangan, Kitcharao, Agusan del Norte.
Narekober ang patay’ng lawas sa biktimang si Roy Olmo Biyog, 23 anyos dunay kaipon, mag-uuma ug residente sa Camp Eduard. Alegria, Surigao del Norte.
Tadtad sa samad pinusilan ang lawas sa biktima sa wala pa nailhing kalibre sa armas.
Sa gilusad nga inisyal nga imbestigasyon nasayran nga namusil kini ug baboy ihalas kauban ang iyang mga higala dihang naabtan sila sa lima ka armadong lalaki.
Gigapos matod pa ang biktima dayong tudlo nga “mao kini ang asset sa kasundalohan”.
Giila usab sa nakasibat nga kaubanan sa biktima ang usa sa mga armado nga si Roy Forteza Samonte alyas Dark nga gituohang myembro sa Guerilla Front Committee sa 16A NEMRC.
Kasamtangan karong gihaya ang patay’ng lawas ni Biyog sa ilang panimalay sa Brgy. Camp Eduard, Alegria, Surigao del Norte.
