BUTUAN CITY – Paningkamotan sa buhatan sa City Transportation and Traffic Management Department kon CTTMD-Butuan nga ma-endorso ang tanang pangalan sa tanang drivers/operators sa tricycle og motorela ngadto sa Department of Social Welfare and Development kon DSWD-Caraga aron mahimong benipisyaryo sa fuel subsidy nga 5-mil pesos.
Sigon ni Eliza Pangilinan, Acting Division Head sa Transport Operations Division sa CTTMD-Butuan nga sa nakalabay nga semana, nagduso na sila og listahan sa DSWD apan lahi matud pa ang template nga gigamit sa maong ahensiya rasong kinahanglan na usab nga mo fill-up niini ang matag driver.
Apan sa pakighinabi ning sibyahan kaganinang alas 11:00 sa buntag, gikumpirma niini nga duna pay 1,019 ka mga drivers nga kulang ang impormasyon sama sa birthday og contact number.
Kini ang rason nga nanawagan ang opisyal nga muadtu sa ilang opisina sa Barangay Doongan o kaha makig-alayon kanila hangtud sa alas 2:00 sa hapon tungod kay gihatagan sila og hangtud karung hapona aron ma-endorso na ang kumpletong listahan ngadto sa DSWD alang sa fuel subsidy.
Giklaro usab sa opisyal nga cash ang ihatag sa DSWD nga fuel subsidy sukwahi sa tabang gikan sa lokal nga kagamhanan nga voucher lang sa kantidad nga 2-mil pesos.
Apan ang makadawat sa DSWD, makadawat gihapon sa LGU Funds. Mas una usab nga muabot ang nasyunal nga tabang kumpara sa LGU nga gipaagi sa ordinansa rasong magkinahanglan pa kini og 15 ka adlaw nga publication./
