BUTUAN CITY – Nalangay ang pagsugod sa morning classes sa Francisco P. Felix Memorial National High School sa Cainta, Rizal kagahapon human nakadawat og sunod-sunod nga hulga sa pagpamusil ug bomb threat nga mikaylap sa social media.
Sumala sa Cainta police, naka-heightened alert ang mga awtoridad ug nagpadayon ang imbestigasyon sa sunod-sunod nga hulga nga nagsugod niadtong Huwebes sa hapon dihang mikaylap sa social media ang mga hulga nga gituohang gikan sa mga dummy accounts.
Daling mitubag ang provincial explosive ug canine unit ug nagsugod pag-inspeksyon sa tibuok eskwelahan gamit ang K-9 units.
Human sa operasyon, gideklara gilayon sa mga otoridad nga luwas ang campus ug walay nakit-ang bomba.
Nagpadayon ang deployment sa Cainta Municipal Police Station sa eskwelahan aron masiguro ang seguridad sa mga estudyante ug mga empleyado.
Nanawagan ang kadumalahan sa eskwelahan ngadto sa mga estudyante, magtutudlo, ug ginikanan nga magpabiling kalmado ug likayan ang pagpanghatag sa dili kumpirmadong impormasyon nga makahatag og panic.
