BUTUAN CITY – Gimando sa Office of the Ombudsman ang unom ka buwang preventive suspension nga wala’y bayad batuk sa lima ka mga project engineers sa Department of Public Works and Highways kon DPWH Bulacan First District Engineering Office.
Gilangkuban kini nila Engr Irene Ontingco, Kevin Geronimo, John Michael Ramos, Bernardo Villafuerte, ug Michelle Cruz tungod sa ilang pagkalambigit sa P188.8-milyon nga ghost flood control projects sa Baliuag, Bulacan.
Nag-atubang sila og mga administratibong kasong grave misconduct, serious dishonesty, ug gross neglect of duty tungod sa tulo ka proyektong reinforced concrete slope revetments niadtong 2024.
Migawas sa imbestigasyon nga gihimo matud pa sa maong mga inhinyero ang pagpalagpot ug pagpeke sa mga dokumento sa inspeksyon, pagdawat ingon man pagbayad aron mura og lehitimo ang mga proyekto.
Gipadayag sa Ombudsman nga kinahanglan ang suspensyon tungod sa kalig-on sa mga ebidensya ug aron malikayan ang bisan unsa mang pagsulay nga impluwensyahan ang mga saksi samtang nagpadayon ang imbestigasyon.
Wala’y apil sa suspension order si kanhi Officer-in-Charge District Engineer Brice Ericson Hernandez ug kanhi Assistant District Engineer Jaypee Mendoza tungod kay dili na sila aktibo sa pagserbisyo sa gobyerno.
