BUTUAN CITY – Padayon pang giplastar sa Department of Education kon DepEd-Butuan City Division ang klase nga himuon sa kapin usa ka gatus ka mga magtutungha sa Sinaka IPEd Elementary School sa Sitio Sinaka, Brgy. Anticala ning siyudad sa Butuan.
Kini human na-abo sa kalayo ang unom nila ka mga make-shift classrooms niadtong Sabado sa ala-una sa kaadlawon.
Sa eksklusibong pakighinabi sa Bombo Radyo Butuan, gipadayag ni DepEd-Butuan City Schools Division Supt. Marilou Dedumo, nga gi-adtuan na sa mga opisyal sa East Butuan District II ang maong tunghaan uban sa kapulisan ug mga bombero aron gayod masuta ang hinungdan sa sunog kondiin gila-uman niyang mahatag kaniya ang incident report karong adlawa.
Paningkamutan nila karong makapatukod na sa labing daling panahon og bag-ong makeshift building aron duna’y magamit ang mga estudyante kinsa ipa-igo una nila karong adlawa sa duha ka mga lawak-tunghaan ug covered court nga nabilin.
Apil sa posibleng himuon nila mao ang pagpa-report sa mga bata sa buntag alang sa emergency classes aron sa hapon, mag-modular na lamang sila.
Mubisita usab siya karong adlawa sa maong tunghaan aron mapinalisar na ang arreangement sa klase ilabina nga face-to-face na ang klase karon.
