BUTUAN CITY – Supak ang Kilusang Magbubukid ng Pilipinas kon KMP sa Pax Silica industrial hub tungod sa ilang kabalaka nga mahimo kining muguba sa Central Luzon nga maoy rice granary sa nasud ilabina sa palibot sa Tarlac kondiin mu-abot sa kapin 2,900 ka mga pamilya sa mga mag-uuma ang ma-apektuhan.
Sa eksklusibong pakighinabi sa Bombo Radyo Butuan, gipadayag ni Danilo Ramos, presidente sa Kilusang Magbubukid ng Pilipinas (KMP), dili lamang kini ordinaryong proyekto sa teknolohiya o development, tungod kay posible kining mosangpot sa pagkawala sa agricultural land, displacement sa mga mag-uuma ug indigenous communities, dugang nga land conversion ug pagmina ingon man, mahimo kining musangpot sa pagkadaot sa kina-iyahan.
Nagpasidaan ang kini nga mahimong supplier lang ang Pilipinas sa minerales ug barato nga labor, samtang ang dagkong benepisyo mapadulong sa mga langyaw nga kompanya tungod kay dili tinuod nga ang mga Filipino ang makabenepisyo niini. Kini tungod sa rasong tinuod lang kini sa panahon sa konstruksyon sa mga pasilidad apan human niini, wala na.
Gikwestyon pa ni Ramos kung kinsa gayud ang makabenepisyo sa pagproseso sa mga mineral sa Pilipinas kung ang mga langyaw maoy mokontrol ug makakuha sa dakong bahin sa kita.
Nanawagan usab sila og transparency ug mas lawom nga pagsusi sa gobyerno sa mga kasabotan ug proyekto nga konektado sa Pax Silica ilabina nga dili angay isakripisyo ang yuta ug panginabuhian sa mga mag-uuma alang lamang niini.
