BUTUAN CITY – Dawat ni Kapitan Alan Toyco sa Brgy. Salvacion ning siyudad sa Butuan ang kasong gipasaka sa Ombudsman ngadto sa korte batuk kaniya ug ni Kagawad Lina Inot.
May kalabutan kini sa kasong paglapas sa Anti-Graft and Corrupt Prctices Act tungod sa pagtukod nila og balay sa ilang barangay site nga alang matud pa sa mga residenteng anaa sa danger zones ilabina sa mga anaa sa flood-prone areas.
Sa eksklusibong pakighinabi sa Bombo Radyo Butuan, gibutyag ni Kapitan Toyco nga nagsumikad ang kaso niadto pang tuig 2007 dihang nagdesisyon siyang ipabarog ang iyang balay sa maong site gikan sa Purok 5 human ang grabeng pagbaha nga halos mi-anod na sa ilang balay kondiin nabutang sa delikado ang kinabuhi sa iyang pamilya.
Gipahimuan na matud pa niya kini og subdivision plan ukg base sa resolusyon sa Sangguniang Panlungsod, i-apod kini ngadto sa 33 ka mga pamilya apan nahunong lang tungod sa gipasakang kaso batuk kanila.
Gidepensahan usab niini si Kagawad Inot tungod kay natukod na matud pa daan ang balay niini dihang wala pa napalit sa city government ang maong luna.
Dili matud pa angayang i-apil sa reklamo ang kagawad apan tungod kay anaa na ang kaso, andam usab siyang tabangan kini base sa ilang gisubmiteng ebidensya.
Samtang, gisaysay usab ni kanhi Brgy. Salvacion Kagawad Jonie Olahay nga tungod usab sa kaluwasan sa iyang pamilya ang rason nga nagtukod usab siya og balay sa barangay site bisan og wala pa ma-award kaniya ang lote.
Dungan-dungan matud pa sila ni Kapitan Toyco pagpatukod dihang ilang nasinatian ang dakong baha nga naghatag og kakuyaw sa kinabuhi sa iyang pamilya.
Dihang nabali ang taas nga bahin sa ilang balay, nagdesisyon na siyang mubalhin aron masigurong luwas ang iyang pamilya higayong duna’y kusog nga ulan nga musangpot na usab sa pagbaha.
