BUTUAN CITY – Gireklamo dinhi sa sibyahan sa Bombo Radyo Butuan ang pagpangulata matud pa sa barangay kapitan niadtong Hunyo 24, sa alas 9 sa gabii sa Barangay Banag-banag, Sibagat, Agusan Del Sur ngadto sa mag-uuma nga si Angel Palman Gersano alyas Abet.
Sumala ni Abet, pa-uli na matud pa siya sa ilang panimalay human sa selebrasyon sa adlawng natawhan sa iyang manghud, dihang gisundan siya sa ilang kapitan nga si Kurt Joseph Rañises, nga naka-inom matud pa niadtong higayuna.
Gibutyag ni Abet nga gituklod matud pa siya hinungdan sa iyang pagka-umod dayong kulata bisan og walay klarong hinungdan.
Wala matud pa’y nakakita sa aktuwal nga pagpanghitabo tungod sa kangitngit ug kay wala pa nanguli ang ubang bisita, apan adunay nakasaksi nga nahadlok matud pang mu-apartar sa kapitan niadtong higayuna.
Dugang pa ni Abet, naka-angkon siya og mga bun-og sa lawas gawas nga mipusa sa iyang walang kilay, hinungdan sa pagpanglagom sa ubang parte sa iyang dagway, bukton ug ingon man ang kilid niini.
Wala na matud pa siya nakadepensa sa iyang kaugalingon tungod kay na-umod na siya sa yuta rason nga igo na lang siyang nagpa-blotter ug nagpa-medical check up isip dokumentasyon sa iyang mga bun-og nga na-angkon.
Apan tungod sa kakulang sa mga testigos, lisod matud pa ang pagpadayon sa legal nga proseso tungod daghang nahadlok moapil sa imbestigasyon.
