BUTUAN CITY – Hilabihan ang pagkadismaya ni Barangay Nongnong, Butuan City Kapitan Wilfredo Membrillos human nalakip siya sa listahan sa mga barangay kapitan nga gisuspende sa Department of Interior and Local Government kon DILG tungod sa anomaliya sa Social Amelioration Program kon SAP distribution.
Sumala pa ni Kapitan Membrillos sa eksklusibong pakighinabi sa Bombo Radyo Butuan, nagsumikad ang kaso sa reklamo ni Malyn Manliguez kinsa napadpad lang sa ilang lugar gikan sa Barangay Manila de bugabos.
Sigon sa kapitan, lakip sa gireklamo ang ilang secretary og usa pa kagawad diin tulo ka kaso ang gisang-at, ang paglapas sa Bayanihan Act, apil na sa graft and corrupt practices act og ang pAglapas sa good conduct and ethical standard.
Saysay pa sa opisyal, gi-akusahan silang nag-monopolize sa listahan sa mga benepisyaryo sa SAP bisan paman nga ang taga-City Social Welfare and Development kon CSWD ang naghimo sa listahan sa makadawat niini og igo lang nag-validate ang barangay council.
Sumala pa sa kapitan, dili sila ang nagbuhat sa payroll og wala usab sila nakahawid sa sobre hinoon igo lang siya sa pagpirma.
Samtang giklaro usab niining dili angayang basolon ang barangay ugaling mag-doble ang entry tungod kay gikan sa DSWD ang nasangpit nga record.
Kini ang rason nga nasakit siya sa gipahamtang nga suspension order apan iya kining dawaton dungan sa panawagan sa mga residente sa Barangay Nongnong nga bisan og dili siya ang maglingkod isip kapitan, padayon silang motabang sa barangay.
