BUTUAN CITY-Giatake sa Israel ang usa ka building sa Bashoura, sentro sa Beirut, human sa evacuation threat nga ilang gipagawas, sumala sa Lebanon’s National News Agency.
Ang maong pagbuto nakapatay og kapin 20 ka tawo ug nakasamdan og daghan pa sa sunod-sunod nga airstrikes nga mingkuyanap gikan sa kapital hangtod sa habagatan ug sidlakang nasud.
Sa Beirut, gibungkag ang usa ka 15-storey building nga giingon sa Israel nga gitagoan og kuwarta sa Hezbollah. Usa ka direktor sa Al-Manar TV ug iyang asawa napatay sa laing raid, samtang ang ilang pamilya nasamdan. Sa Sidon, usa ka paramedic nailhan nga usa sa mga biktima sa airstrike nga mitarget og sakyanan.
Sumala sa Health Ministry, kapin 912 na ang patay lakip ang 111 ka bata, ug labaw 2,200 ang samdan sukad Marso 2, samtang kapin 1 milyon ka tawo ang napalayas sa ilang panimalay.
Ang United Nations nagpahimangno nga ang pagtarget sa mga sibilyan ug residential buildings mahimong war crime.
Sa kasamtangan, si Presidente Aoun nagpatawag og high-level security meeting samtang si Hezbollah Secretary-General Naim Qassem naglatid og kondisyon alang sa pagtapos sa gubat, lakip ang paghunong sa Israeli attacks ug pagbalik sa displaced nga mga tawo.
