Kapin 221-mil pesos sa illegal nga kahoy, nakumpiska sa usa ka semana nga operasyon sa Caraga
BUTUAN CITY – Mobalor sa kapin 221-mil ka pesos nga kantidad sa illegal nga kahoy ang nakumpiska sa otoridad sa Caraga sulod sa usa ka semana nga anti-illegal logging operation.
Gawas pa kini sa na-arestong suspetsado.
Sigon ni Police Chief Superintendent Rolando B. Felix, Caraga Police Regional Director, nakumpiska sa elemento sa Cagdianao Municipal Police Station ang gi-abandona nga illegal nga kahoy nga mobalor sa 60-mil pesos sa Brgy. Legaspi, Cagdianao, Dinagat Island.
Samtang sa hiniusang operasyon sa kasundaluhan, kapulisan ug mga personahe sa Department of Environment and Natural Resources kon DENR sa may Brgy. Baan, Butuan City, nasikop si Jonnie Navarro, 49-anyos sa paglapas sa Forestry Code of the Philippines human na-aktuhan sa pagbiyahe ug illegal nga kahoy mikantidad ug halos 34-mil pesos.
Sa Surigao del Sur, daling miresponde ang otoridad sa report nga dunay mga illegal nga kahoy sa lungsod sa Tagbina ug Tago nga miresulta sa pagkakumpiska sa 127 ka kahoy nga balor sa halos 77-mil pesos.
Gilusad usab ang Anti-Illegal logging joint operation sa may Brgy. Dacutan, Esperenza Agusan del Sur nga miresulta sa pagkumpiska sa gi-abandonang kahoy nga mokantidad sa 42-mil pesos.
