BUTUAN CITY – Gikumpirma ni Police Regional Office kon PRO-13 regional director BGen Joselito Esquivel Jr., nga gikonsidera na nila nga private armed group (PAG) ang security forces ni Kabus Padatoon kon KAPA Community Ministry International Inc. founder Joel Apolinario.
Sigon sa opisyal, ang sobra kadaghan sa mga nakumpiskang high-powered firearms, mga eksplosibo; mga bala sa nagkada-iyang klase sa armas ug uban pang mga war materials, klaro na nga ebidensyang nagtiner kini og armadong grupo kansa sukwahi sa angayan untang tamdan sa usa ka community ministry.
Sa pagkakaron, nakatutok ang PRO-13 sa pag-atiman sa kasong kriminal batuk sa magti-ayong Reyna ug Joel Apolinario ug ilang mga alipores human ang dugu-ong pag-serve sa mga warrants of arrest gikan sa korte.
Gawas sa gi-atubang na nilang kasong syndicated estafa, mupasaka na usab sila og mga kasong illegal possession of firearms and explosives kansa wala’y girekomendang pyansa ingon man kasong direct assault tungod sa ilang pagsukol sa operating troops hinungdan sa engkwentrong mikalas og duha ka mga tawo ug mi-angol sa laing usa.
Sa mismong press conference kagahapon, opisyal nang gi-ila ang mga namatay nga sila Allan Binongo, 39-anyos, residente sa Leyte ug Dennis Dialoding, 38-anyos, residente sa lungsod sa Malongon, Sarangani Province samtang ang una nang gikatahong namatay nga si Melecio Siano nga taga-Brgy. Tabon, Bislig City, kumpirmadong na-angol lang.
