BUTUAN CITY – Nakigtagbo si Foreign Minister Abbas Araghchi sa Iran ngadto kang Field Marshal Asim Munir nga maoy nanguna sa armadong puwersa sa Pakistan.
Sigon ni Araghchi nga human sa ilang panagtigum sa Pakistan, mobiyahe kini ngadto sa Oman og Russia aron makig-alayon sa ilang mga partners sa bilateral matters og mokunsulta sa regional developments.
Una nang gibutyag sa Tehran nga wala silay plano sa direktang pakig-estorya sa US apan sumala sa Iranian officials nga anaa kini sa Pakistan alang sa mga diskusyon samtang padulong usab sa maong nasud ang mga negotiators gikan sa Estadus Unidos.
Una nang nagpahugot sa seguridad ang Pakistan human usab gipahayag ni US President Donald Trump nga ang ilang representante mobalik alang sa hisgutanang pangkalinaw ngadto sa Iran.
Kini gilangkuban nila US envoys Steve Witkoff og Jared Kushner nga muadto sa Islamabad tungod kay gusto matud pa sa Iran nga makig-estorya personal.
Apan base sa impormasyon, ang US og Iranian delegations dunay managlahing meeting ngadto sa mga opisyales sa Pakistan karung semanaha apan kung mahimong ma-anindot ang maong mga panagpulong, posibleng magtagbo ang duha ka panig sa adlaw nga Domingo.
