BUTUAN CITY- Boluntaryong misurender sa mga tropa sa gobyerno ang kanhing Secretary sa gibungkag nga North Eastern Mindanao Regional Committee (NEMRC) sa Communist Terrorist Group (CTG), si Elena Estaniel Rambuyon, alyas “Sandara,” sa hedkuwarter sa 3rd Special Forces Battalion sa Lianga, Surigao del Sur niadtong Hulyo 24.
Sumala sa militar, dugay nang nagtago si Rambuyon sukad Nobyembre 2025 ug nakahukom nga motahan tungod sa kahadlok alang sa iyang kaluwasan ug sa padayon nga operasyon sa kasundalohan nga nakapugong sa lihok sa nahibiling mga miyembro sa grupo.
Sigon sa 401st Infantry Brigade ug 4th Infantry Division, ang maong pagsurender usa ka timailhan sa padayon nga pagkahuyang sa CTG sa Caraga ug nagpalig-on sa deklarasyon sa Stable Internal Peace and Security sa rehiyon, uban sa saad nga ipadayon ang mga operasyon aron mapreserbar ang kalinaw, seguridad, ug kalamboan.
