BUTUAN CITY- Mingtaliwan na sa edad nga 74-anyos ang kanhi emir sa Qatar nga si Sheikh Hamad bin Khalifa Al Thani, ang lider nga giilang Qatar’s Modern Architect tungod sa iyang dakong papel sa pagbag-o sa nasod ngadto sa usa sa labing adunahan ug impluwensyal sa kalibotan.
Sukad sa iyang pagsaka sa gahom niadtong 1995, gigamit niini ang natural gas wealth aron mapalambo ang ekonomiya, edukasyon ug mga reporma sa politika ug katilingban, nga misangpot sa paspas nga pagtubo sa Gross Domestic Products kon GDP ug paghimo sa Qatar isip pinakadakong eksportir sa liquefied natural gas.
Ilalom sa iyang administrasyon natukod ang Qatar Foundation, gilunsad ang usa ka News Channel, ug gipatuman ang unang permanenteng konstitusyon sa nasod samtang gihatagan og katungod sa pagboto ug pagdagan ang kababayen-an.
Tungod usab niini, nakab-ot sa Qatar ang katungod sa pag-host sa 2022 FIFA World Cup ug nailhan sa aktibong papel sa diplomasya sa Middle East.
Niadtong 2013, malinawon niining gibalhin ang liderato ngadto sa iyang anak nga si Sheikh Tamim bin Hamad Al Thani, usa ka talagsaong transisyon sa rehiyon nga nagpakita sa hapsay nga pagbalhin sa gahom.
