BUTUAN CITY – Gilimod ni Kanhe Ombudsman Samuel Martires ang alegasyon nga midawat siya og kwarta gikan sa mga ginsakpan ni kanhe Pangulong Rodrigo Duterte.
Migawas ang pamahayag human ang testimonya ni Ramil Madriaga sa Kamara niadtong Abril 14, 2026, diin gibutyag niyang naghatod siya og duha ka bag nga dunay sulod nga tag-35 milyones pesos sa parking lot sa Office of the Ombudsman niadtong Disyembre 2022.
Sigon ni Madriaga, ang kwarta nagsumikad sa kampo ni Duterte ug gilambigit usab sa paggamit sa confidential funds sa Office of the Vice President sa ilalom ni Sara Duterte.
Ang nasangpit nga alegasyon kabahin sa imbestigasyon mahitungod sa impeachment case batuk kang VP Sara Duterte, nga gika-ingong paspas nga nagastos ang 125 milyong confidential funds niadtong 2022.
Hugot usab nga gilimod ni Martires ang bisan unsang kalambigitan sa nasangpit nga transaksyon ug gipamugos nga walay basehan ang mga pasangil.
Ang kontrobersiya padayon nga gibantayan sa publiko tungod sa implikasyon niini sa integridad sa mga institusyon sa gobyerno ug sa kasamtangang proseso sa impeachment batuk sa Bise Presidente.
