BUTUAN CITY – Gikuwestyon ni kanhe Congressman Mike Defensor kung unsa ang tinood nga basehan sa balaod mahitungod sa kasong plunder.
Kini human hingpit nang gikasuhan siya ug si Senador Rodante Marcoleta sa kasong plunder sa Sandiganbayan kagahapon, Biyernes, Hulyo 3.
Sa usa ka pamahayag, gipamugos ni Defensor nga ang nadawat ni Marcoleta mga campaign donation ug walay bisan unsang nalambigit nga pondo sa gobyerno.
Wala usay gikawat gikan sa kaban sa katawhan ug walay pabor nga gipangayu, gisaad o gihatag bugti sa donasyon rasong natingala siya kung nganung nahimo kining plunder o pagpangawkaw.
Gipamugos sa kanhe magbabalaod nga kung ingon ani ang giduso nga “legal theory” sa gobyerno dapat kining ipatuman nga patas sa tanan.
Gipa-ambit ni Defensor nga base sa mga pampublikong dokumento, migawas nga naghatag og donasyon ang mga opisyal sa kampanya ni Pangulong Ferdinand Marcos Jr. niadtong iniliay lakip na ang 247 milyones pesos gikan kang Special Assistant to the President Anton Lagdameo, tag-30 milyones peso gikan nila PCSO General Manager Mel Robles ug DA Sec. Francisco Tiu Laurel Jr.
Ang mga indibidwal gibutan sa mga tag-as nga posisyon sa gobyerno.
Gitin-aw usab ni Defensor nga wala niya gisulti nga ilegal kini kundi gibutyag lang niya ang kamatooran.
Sumala pa niini nga kung ang campaign donations gigamit na karun isip basehan sa kasong plunder, dapat usab kining susihon sa parehong lebel sa imbestigasyon.
Gitumbok ni Defensor nga dili dapat makabaton og managlahing standard o dobleng basehanan ang balaod, nga lahi para sa mga kalaban sa pulitika ug lahi usab para sa mga kaalyado.
Sigon niini nga dili kini makonsiderang patas nga hustisya kundi usa ka tataw nga klase sa selective justice.
Bisan paman niini, gibutyag ni Defensor nga andam niyang atubangon ang mga kaso sa tukmang korte tungod kay anaa sa panig niya ang kamatooran, wala siya’y gitago ug walay dapat kahadlokan.
