BUTUAN CITY – Padayon ang imbestigasyon sa kapulisan sa Buenavista, Agusan Del Norte aron masuta ang tinood nga panghitabo human nakalutan ang mga bukog sa gitu-uhang usa ka babaye kagahapon sa alas 5:30 sa buntag sa may Purok 2, barangay Abilan sa maong lungsod.
Nasayrang gipa-abot na lang ni Barangay Kapitan Marianne Balansag ngadto sa kapulisan ang pagkadiskubre sa bukog sa tawo og senina niini nga pangbabaye dihang nagkalot ang usa sa iyang residenteng si Salvador Alejandrea Makiling alang sa himuong fishpond.
Gilayon usab nga nag-request ang kapulisan og assistance gikan sa SOCO Team ug uban sa tabang sa ubang mga residente, gipadayon ang pagkalot sa maong yuta nga miresulta sa pagkadiskubre sa uban pang mga bukog sa tawo.
Base sa pamahayag sa Barangay Kapitan, wala siya makadawat og taho mahitungod sa nawalang tawo sa ilang barangay rason nga padayon ang ilang panawagan niadtong nawad-an og kabanay nga makig-alayon lang kanila o kaha sa Regional Forensic Unit kon RFU-13 nga maoy nagkostudiya sa mga bukog alang sa pagpa-ilalom nini sa forensic examination alang sa personal identification niini.
