BUTUAN CITY – Patay sa ambush ang presiding judge sa Regional Trial Court (RTC) Branch 2 sa Isabela City, Basilan nga si Judge Joseph Wee Sit human gibanhigan sa mga armadong motorista sa Tumaga-Putik Road, Barangay Tumaga, Zamboanga City, kaganinang buntag.
Nasayrang padulong unta sa pantalan sa Zamboanga City si Judge Sit aron mosakay og ferry paingon sa Isabela City, Basilan, sakay sa iyang sports utility vehicle (SUV) dihang gipa-arakan sa wala pa mailang mga suspek ang iyang sakyanan hinungdan nga naka-angkon kini og daghang samad-pinusilan.
Gidala dayon siya sa ospital sa mga emergency responders alang sa medikal nga pagtabang, apan gideklara kining dead-on-arrival.
Gikumpirma sa mga opisyal sa Zamboanga City Police Office ug lokal nga mga opisyal ang iyang pagkamatay, samtang gipa-abot ang dugang detalye bahin sa motibo ug mga responsable sa maong pagpamanhig.
