BUTUAN CITY- Gipadayag ni Atty. Sonny Matula, Presidente sa Federation of Free Workers nga alang kanila kinahanglang ipadayon ang impeachment proceedings batok kang Vice President Sara Duterte, tungod aduna matud pay mga ebidensyang gipresentar sa House of Representatives nga kinahanglan matuki ug mapaminawan sa hustong proseso.
Sumala pa ni Matula, dili angay nga malangay o mabitin ang kaso tungod kay dili lamang ang prosekusyon ang angay tagaan og due process kondili lakip usab ang depensa aron mahatagan si Duterte og patas nga higayon sa pagdepensa sa iyang kaugalingon batok sa mga alegasyon.
Gipasabot usab niini, nga kon walay impeachment trial sa Senado, dili makahatag og kahigayunan ang Bise Presidente sa pagpanghimatuod nga kulang o dili igo ang mga ebidensya aron kini makonbikto, samtang obligasyon usab sa mga prosecutors ang pagpresentar sa lig-on nga ebidensya aron mapamatud-an ang ilang mga alegasyon.
Dugang pa ni Atty. Sonny Matula, ginaampo nila nga bisan ang mga higala ug political allies sa mga nalambigit sa impeachment case motan-aw sa mga ebidensya nga walay pagpabor o paghatag og kolor sa proseso. Sigon pa niini, importante nga mahimong patas ug impartial ang impeachment trial sa Senado aron masiguro nga ang desisyon ibase lamang sa mga kamatuoran ug ebidensyang ipresentar sa duha ka panig.
Matud pa sa abogado, bisan adunay mga obserbasyon nga posibleng adunay pabor o igong suporta alang sa Bise Presidente, kinahanglang magdepende gihapon ang panan-aw sa publiko ug sa mga senador nga molingkod isip impeachment judges sa kabug-aton sa ebidensyang ipakita sa hearing, nga mahimo usab makaimpluwensya sa ilang paghukom sa maong kaso.
