BUTUAN CITY – Posibleng maglisod pagkuha og suporta sa Senado ang impeachment complaint batuk kang Vice President Sara Duterte.
Sigon ni political analyst Professor Arjohn Aguirre, bisan og suportado sa ubay-ubay nga membro sa Kamara ang maong reklamo, posibleng dili na kini makakuha og susamang suporta sa Senado tungod kay mahimong onse o kaha dose ka mga senador ang musuporta sa pagbasura niini kung madayon kini sa full trial.
Bisan og napulo lang o mas ubos pa ang mga membro sa Duterte bloc kon minority bloc, nagtuo si Aguirre nga pipila ka mga membro sa majority ang mupabor kang VP Sara.
Hinuon, wala usab gisalindot sa propesor ang posibilidad nga ma-usab pa gihapon ang desisyon kon panglantaw sa ubang mga senador ilabina nga mas nagkalawom pa ang pagdungog sa House Justice Committee kondiin daghang mga impormasyon ang nanggawas ug karon lang nabulgar sa publiko.
