BUTUAN CITY – Hustisya ang singgit sa pamilya Bersabal sa Brgy. San Vicente ning siyudad tungod sa pagpatay sa 22-anyos nga ulitawong si Elvis kinsa gilabay sa pangpang sa Purok 7 sakop sa Brgy. Bonbon ug kagahapon lang napalgan human nahanaw niadto pang Agusto 7.
Sa eksklusibong pakighinabi sa Bombo Radyo Butuan, gibutyag ni Bonbon Brgy. Kapitan Segundina ‘Dina’ Mondia nga naka-istorya niya ang amahan mismo sa biktima kinsa positibong mi-ila nga mao kini ang na-missing niyag anak bisan og sa sinugdanan, ang tiil pa lang ang iyang nakita gikan sa gisudlan niining karton.
Sigon ni Kapitan Mondia, pasado alas-dose na sa tungang gabii nakuha ang patay’ng lawas sa biktimang gitu-uhang gi-salvage tungod sa bangag sa iyang ulo.
Madumdumang napalgan ang patay’ng lawas kagahapon sa hapon tungod sa dili na masingo nga baho niini hangtud nga nakumpirmang tawo diay kini og inanay nang nadugta.
Padayon pang gipakisayran sa mga otoridad ang responsable ug ang motibo sa maong kremin.
