BUTUAN CITY – Gipadayag ni Justice Panel Chairman ug Batangas Rep. Gerville Luistro nga klaro sa Konstitusyon nga ang Kamara maoy adunay gahum sa pagsugod sa impeachment batok kang Vice President Sara Duterte bisan pa sa mga petisyon nga gisang-at ngadto sa Supreme Court.
Sa pagbukas sa pagdungog, gibutyag ni Luistro nga anaa sa Kamara ang unang lihok ug direksyon sa proseso.
Ang pulong matud pa nga exclusive power nagpasabot nga sa Kamara magsugod ang impeachment, samtang ang Senado mao ang magsilbing impeachment court ug magdesisyon kung aduna’y sala o wala ang opisyal.
Gipasabot usab niya nga dili pa kini pormal nga pagtaral kondili usa pa lamang ka pagsusi kung adunay igo nga basehan aron ipadayon ang kaso ngadto sa Senado.
Gitubag usab sa magbabalaud ang alegasyon nga milapas na sa gahum sa Senado ang komite.
Iyang gipasabot nga lahi-lahi ang papel sa duha ka kapulungan sa Kongreso ug klaro nga nakalatid sa Konstitusyon nga ang Kamara ang mag-imbestigar, samtang ang Senado ang maghukom.
Bisan pa sa mga panawagan nga hunongon ang pagdungog tungod sa ubang problema sa nasod, gipadayag ni Luistro nga kaya sa gobyerno ang pagdumala sa daghang buluhaton sa usa ka higayon.
Dili matud pa mahimong rason ang kadaghan sa problema aron pasagdan ang usa ka importante nga isyu.
Samtang mahitungod sa mga petisyon sa Korte Suprema, gibutyag ni Luistro nga dili kini igo nga rason aron ihunong ang proseso tungod kay nanginahanglan matud pa ang katawhan og klarong tubag sa mga alegasyon ug dili lamang teknikal nga argumento.
Alang kang Luistro, ang isyu dili mahitungod sa personalidad kondili sa tulubagon sa publiko ug tumong sa komite ang pagpangita sa kamatuoran ug pagtino kung adunay igo nga basehan aron ipadayon o ihunong ang impeachment.
Sa katapusan, giklaro niya nga ang Kamara kinahanglan maggiya sa Konstitusyon ug sa kaayohan sa nasod labaw sa tanan.
