BUTUAN CITY – Miani og naglain-laing reaksiyun ang nahimong hisgutanan sa Zona Libre Program mahitungod sa linyang ‘Bakuna una adiser eskwela’.
Nasayran nga ang nasangpit nga linya nakalatid sa sulat nga gipaabot sa usa ka ginikanan ngadto sa Department of Education kon DEpEd human gitakda ang pag-abli sa klase sa Agosto 24 taliwa sa Covid19 pandemic.
Kadaghanan sa mga reactor sa programa misupak sa gitakdang pag-abli sa klase og mibarog nga dili nila patunghaon ang ilang mga anak ugaling wala pay bakuna.
Sumala pa sa mga niini, dili nila ibutang sa dakong risgo ang ilang mga anak samtang duna pay nagsugyot nga sunod tuig na itakda ang pag-abli sa klase.
Base matud pa sa obserbasyon, dili pa mahimong limpiyo sa covid-19 ang Pilipinas samtang giklaro usab sa World Health Organization nga mahunong lang ang krises ugaling duna nay bakuna batuk sa maong virus.
Dunay reactor usab nga gibarugan ang iyang panglantaw nga dili uyon sa pag-abli sa klase pinaagi sa gipunto nga ang ginikanan maoy unang magtutudlo sa ilang mga anak ug daghang mga mi-gradwar usab nga walay trabaho.
Samtang dunay nagpahayag nga pag-usik-usik lang sa panahon og kwarta ang gitakdang pag-abli sa klase karung Agosto.
Apan dunay reactor usab nga usa ka magtutudlo ang midepensa sa pag-abli sa klase nga nakalatid matud pa sa balaod nga gisunod lamang sa DepEd. Hinoon pwede matud pa kining amendahan ugaling gikinahanglan.
Sumala pa niini, nga lisud karun ang trabaho sa DepEd tungod kay kinahanglan nilang ekonsidera ang kaluwasan sa kabataan.
Kini ang rason nga silang mga magtutudlo, dunay mga seminars pinaagi sa internet aron mahasa sa tulo ka options nga nakitang epektibo sa edukasyon ning panahon sa krises nga dala sa makamatay nga virus.
Kini mao ang modular diin hatagan lang og mga modules ang bata, ikaduha ang traditional gihapon apan dili na lima ka adlaw ang eskwela o gang ikatulo mao ang online.
