BUTUAN CITY – Nahidangat na kaganina dinhi sa dakbayan sa Butuan ang 1,480 ka mga vials kon 14,800-doses sa AstraZeneca vaccine kansa gisugat ni Dr. Jose Llacuna Jr., regional director sa Department of Health kon DOH-Caraga ug uban pang mga opisyal kansa gideretso usab ngadto sa ilang storage facility sa warehouse nila sa Brgy. Doongan ning siyudad.
Sigon ni Dr. Llacuna, swerte ang rehiyon nga nagahinan sa limitadong supply sa maong bakuna nga matupok unya ngadto sa 7,400 ka mga senior healthcare workers ning rehiyon.
Sa gihimong press briefing, sugdan ang roll out sa maong bakuna higayong matapos na ang pagtupok sa Sinovac vaccines kansa karon mi-abot na matud pa sa kapin 1,400 ka mga healthcare frontliners ang natupukan.
Sa pagkakaron sukad gisugdan ang pagtupok sa Sinovac vaccines, 11 lang ka mga vaccinees ang nakasinati og adverse effect apan aron na-ulian na ug naka-uli na usab sa ilang tagsa-tagsa ka pinuy-anan.
Dugang pa sa opisyal, susama ra matud pa kini og gikinahanglang temperatura sa Sinovac apan alang kini sa mga senior citizens nga mga healthcare workers.
Kung duna’y sobra, mangayo sila og kagahom sa ilang sentrong buhatan sa ingon mahatagan na usab sila og listahan kung kinsa ang sunod nga tupukan sa nangabot nga AstraZeneca vaccines.
Gipasabot usab niini nga bisan og usa siya ka health worker ug senior citizen na kansa qualified nga maka-avail sa AstraZeneca, apan mag-agad pa gihapon siya sa mando sa ilang sentrong buhatan kung kanus-a sila magpatupok.
