BUTUAN CITY – Nanawagan ang grupong Karapatan ngadto sa mga senator-judges nga mag-amping sa ilang mga pamahayag ug paglihok samtang nagpadayon ang pagtaral sa impeachment case ni Vice President Sara Duterte.
Gipadayag kini sa grupo human nangutana si Senator-Judge Risa Hontiveros ngadto sa testigong si John Mark Calilung – kinsa senior agent sa National Bureau of Investigation kon NBI kalabot sa article 4 sa Articles of Impeachment.
Gipamugos ni Hontiveros nga wala pa’y gihikyad nga ebidensya nga nagpamatuod nga tinuod nga mikuha og o nagkontrata og usa ka assassin ang besi presidente dayong pangutana sa prosekusyon nganong makonsiderang impeachable ang maong pamahayag.
Sigon ni Karapatan national council member Raoul Manuel, ang bisan unsa mang komento o linya sa pangutana sa mga senator-judges, mahimong maka-apekto sa dagan sa pagtaral ug maghatag og managlahing interpretasyon sa publiko ilabina nga sila usab ang magdesisyon sa kaso.
Kinahanglan usab matud pang mahimong responsable ang mga senator-judges sa ilang mga pamahayag ug paagi sa pagpangutana aron mamintina ang kapatas ug kredibilidad sa impeachment court.
