BUTUAN CITY – Malampusong nasunog sa ginsakpan sa Philippine Drug Enforcement Agency kon PDEA-Caraga ang 1.44-kilos nga shabu nga nagkantidad og 7-milyunes pesos ingon man 86.36-gramos nga marijuana nga nagkantidad usab og 10,722-pesos sa hawanan nga bahin sa 402nd Brigade, Philippine Army sa Bancasi kagahapon.
Ang maong lakang isip pagsunod sa direktiba ni Pangulong Rodrigo Duterte ngadto sa tanang regional offices sa PDEA sa nasud nga gub-on na ang tanang illegal drugs evidences ug illegal paraphernalia nga nakumpiska sa mga otoridad sa ilang gilusad nga mga illegal drugs operations.
Ang mong mga ilegal drugs nahukman na sa nagkada-iyang korte sa rehiyon ug duna na’y mga court orders gikan sa mga kasong nahukman niadto pang tuig 2015 hangtud sa kasamtangan kansa nasubay sa Office of the Court Administrator (OCA) Circular 118-2020 nga i-isyu sa Supreme Court Administrator ingon man usab sa Department of Justice (DoJ).
Sigon ni Agusan del Norte Governor Dale Corvera, dugay nang problema sa tibuok rehiyon ug sa tibuok nasud ang pagkaylap sa ilegal nga druga nga nariyalisar lang niya ang kadako niini paglingkod na ni Pangulong Rodrigo Duterte dihang gipakusgan niini ang illegal drugs campaign.
Kini ang rason nga nabalaka siya kung unsa na unya ang mamahimong dagan sa operasyon niini, higayong mawala na sa posisyon si Pangulong Duterte.
Una nang gipasalig usab ni Dindo Abellanosa- information officer sa PDEA-Caraga, nga walay mahitabong “swapping” o pag-alilis sa mga gisunog nga druga tungod kay hugot ang ilang pagpatuman sa ilang mandato ug sa accounting nga gihimo sa ubang ahensya sama sa National Bureau of Investigation (NBI).
