BUTUAN CITY – Aminado si Senate President Pro Tempore Panfilo “Ping” Lacson nga dunay pipila ka grupong misulay sa pagpangayu og suporta gikan sa mga miyembro sa uniformed services para sa posibleng military-backed “People Power revolution,” apan hanap nga magmalampuson ang ingon ani nga lakang.
Sigon ni Lacson, nakadawat siya og impormasyon nga dunay pipila ka retiradong opisyal nga naningkamot sa pagpanguha og suporta gikan sa sulod sa Armed Forces of the Philippines (AFP).
Duna matud pay siguradong misulay apan anaa sa gawas sa AFP og kung aduna man sa sulod, pipila lang kining nakumbinsing moapil sa nasangpit nga grupo.
Base sa iyang mga contact sa Philippine National Police (PNP), wala matud pa siyay nakitang senyales nga modako o “snowball” ang nasangpit nga grupo.
Nagtoo usab si Lacson nga walay tsansa ang nasangpit nga lihok tungod kay nagpabiling propesyonal ang AFP. Pamugos pa ni Lacson, basta magpabiling professional ang AFP nga mao usab ang iyang gitoohan, walay bug-at nga rason para makabaton og military junta o bag-ong People Power revolution.
Si Lacson nagsilbi sa uniformed service gikan sa 1971 hangtud sa 2001 sa parehong AFP ug PNP, ug nahimong PNP Chief gikan sa 1999 hangtud sa 2001.
Niadtong nakalabay nga tuig, gibabagan usab ni Lacson ang ideya sa military-backed “reset” o junta taliwa sa kasuko sa publiko sa mga hisgutanang korapsyon.
Sumala pa niini nga dapat mopatigbabaw ang tulubagon apan dili ang pagkaguba sa 1987 Constitution of the Philippines.
Gitumbok usab niini nga sa ilalom sa Konstitusyon, natapos sa House Speaker ang linya sa presidential succession.
Kini matud pa ang rason kung nganung giduso niya ang Designated Survivor Bill nga magpalapad sa succession line aron maapil ang pinaka-senior nga miyembro sa Senado ug Kamara.
