BUTUAN CITY -Nakasakmit og silver medal ang Gilas Pilipinas 3×3 women’s team sa FIBA 3×3 Asia Cup human napildi sa Australia, 18-9, sa finals didto sa Singapore.
Kini ang unang higayon nga naka-podium finish ang Pilipinas sa maong torneo, mas maayo kaysa sa ika-upat nga puwesto sa mi-aging tuig human napildi sa China sa bronze medal match.
Sa finals, kusog nga nakadagan ang Australia sa 6-0 start sa sinugdanan, apan nakapuntos si Kacey Dela Rosa aron makasugod ang Gilas. Nakaduol pa ang Pilipinas sa score nga 12-7, pero sunod-sunod nga two-pointers ni Kristy Wallace ug Amy Atwell ang nakapabalik sa kontrol sa mga Australyano.
Sa katapusan, nakadugang pa si Atwell og two-pointer gikan sa top of the key ubos sa usa ka minuto nga nahabilin, nga nakaseguro sa kadaugan sa Australia bisan pa sa ulahi nga mga puntos ni Cheska Apag.
Nakapuntos si Afril Bernardino og 4, si Kacey Dela Rosa og 3, ug si Cheska Apag og 2 puntos.
Ang kadaugan naghatag sa Australia sa ilang ika-upat nga sunod-sunod nga gold medal sa kompetisyon samtang ang China nakadaug sa bronze medal human gipildi ang Japan, 20–15.
Apil si Bernardino sa Team of the Tournament, kauban ni Kristy Wallace sa Australia ug ZhiTing Zhang sa China.
Samtang ang Gilas Men’s 3×3 team napildi sa South Korea (15–18) sa quarterfinals ug wala na naka-abot sa medal round.
