BUTUAN CITY – Malampusong na-rescue sa kapulisan sa Claver, Surigao del Norte ang 7-anyos nga misteza Intsik nga batang babaye human kini gidagit dihang padulong na sa eskwelahan ning mi-aging adlaw’ng Lunes.
Sa eksklsibong pakighinabi sa Bombo Radyo Butuan, gibutyag ni PMSgt Michelle Edera-Lareza sa Community Affairs Division-Police Non-Commissioned Office sa Claver Municipal Police Station, na-ilhan nila ang suspetsadong si Jonathan Duldulao, biyudo, residente sa Tagum City, human nadumduman sa maguwang sa biktima ang tingog niini.
Nasayrang kanhi hinigugma diay sa lola sa biktima ang suspetsado kinsa gustong makigkita sa ilang apuhan rason nga nahuna-hunaan ang pagdagit sa bata.
Dugang ni Lareza, dihang ila nang na-istorya ang 10-anyos nga maguwang sa biktima, misulti kining wala niya ma-ilhi ang nawong niini tungod sa gisuot nga full-faced helmet apan iyang nadumduman ang tingog rason nga kini ang gihimong basehan sa malampusong paglusad sa search and rescue operation.
Base sa kuha sa CCTV footage, gibabagan sa nakamotorsiklo suspetsado ang dalan nga gi-agi-an sa managsoon kinsa gihatud sa ilang 12-anyos nga uyuan sakay sa e-bike ug duna’y panag-istoryahanay tali sa maguwang sa bata hangtud nga nadala ang biktima nga wala’y natigayong komosyon.
