BUTUAN CITY – Andam na sa ilang exhibition match ugmang adlawa, oras sa Pilipinas, sila retired boxers Ricky Hatton ug Marco Antonio Barrera nga himuon sa Manchester.
Mitimbang si Hatton og 159.9-libras, samtang si kanhi three-division world champion Marco Antonio Barrera mitimbang usab og 161-libras sa ilang gihimong weigh-in kagabii.
Bisan og upat ka tuig nga mas maguwang kang Hatton, ang 48-anyos nga si Barrera (67-7, 44 KOs), mas batan-on pang nga tan-awon ug anaa sa mas maayong physical shape.
Bisan og migamay si Hatton apan siento-porsiento gihapong andam siya sa maong away, bisan og miretiro siya sa boksing niadtong 2012.
Gika-ingong ang net worth ni Hatton anaa sa $40 million niadtong tuig 2012 rason sa iyang pagretiro human ang iyang pagbalik sa away gikan sa tulo ka tuig nga layoff aron awayon si Vyacheslav Senchenko.
