BUTUAN CITY – Misangpot sa 0-0 draw ang away tali sa mga bigating football teams nga England ug Ghana kondiin wala’y naka-goal kanila tungod sa lig-on ug lawom nga depensa bisan pa sa daghang pagsulay nga makapuntos.
Sa panig sa Ghana, gigamit nila ang taktika nga park the bus aron mapugngan ang opensiba sa England. Sa unang bahin sa duwa, halos 80% possession ang gikuptan sa England, apan napugngan gihapon sa Ghana ang tanan nilang pagsulay.
Sa ika-86 minuto, nakahigayon na unta ang England nga makapuntos pinaagi sa header ni substitute Nico O’reilly, apan mi-igo kini sa crossbar. Ang rebound nga gisundan ni striker Harry Kane nasayang usab kay mi-igo lang ibabaw sa net.
Tungod sa tablang resulta, parehong adunay 4 puntos ang England ug Ghana sa Group L. Kinahanglan na lang nila makakuha og usa ka punto sa ilang katapusang duwa aron masiguro ang pagsulod sa Round of 32.
