BUTUAN CITY – Gidugok sa gatusang mga deboto Katoliko ang Misa sa Pagsugat kon Easter Sunday Mass sa St Joseph Cathedral nga gipahigayon sa Father Saturnino Urios University kon FSUU gym.
Gisugdan kini pasado alas-kwatro sa kaadlawon pinaagi sa pagpahigayon una ug pagsugat sa imahe ni Birheng Maria ngadto sa nabanhaw nga imahe ni Hesu Kristo human sa iyang kamatayon.
Sentro usab sa atensyon ang mga batang nagsilbing anghel nga maoy nagkanta sa mga kanta sa simbahan atol sa misa.
Ang Easter Sunday alang sa mga Kristiyanos hilabihan kamahinungdanon tungod kay karong adlawa nabanhaw si Hesus sa ikatulong adlaw human Siya mamatay sa krus sa Biyernes Santo.
Gisaulog kini isip sinugdanan sa bag-ong kinabuhi human gitugyan ni Hesus ang Iyang kinabuhi aron pagtubos sa katawhan gikan sa mga sala. Kini ang kadaugan sa gugma ug pagpasaylo sa Ginoo sa katawhan, ang kadaugan sa kahayag batok sa kangitngit.
Mao usab kini ang magtapos sa Kwaresma, ang 40 ka adlaw nga pagpuasa, paghinulsol ug pagpugong sa kaibog isip pagtimaan sa pag-antos ug pagkamatay ni Hesus.
