BUTUAN CITY – Mag-atubang og kasong frustrated murder ang usa ka dump truck helper human niini gimartilyo ang agtang sa iyang kauban sa trabaho pasado alas 9:30 sa niaging gabii sa Capitol Bonbon Road sa Hidalgo Village, Brgy. Libertad, Butuan City.
Naila ang biktima nga si Roberto Balbarona Velez Jr., 36-anyos, usa ka drayber kansa stay-in sa JH Hollow Blocks sa dapit nga nahitabuan ug residente sa Balang Balang, RTR, Agusan Del Norte samtang ang suspek nailang si Jonathan Cinco Silag, 36-anyos, menyu, stay-in usab sa maong trabahoan og taga Purok-5, San Isidro, Sibagat, Agusan Del Sur.
Sigon sa Butuan City Police Station 3, samtang natulog ang biktima diha sa iyang duyanan, kalit lang nga mibutho ang suspek ug sa walay daghang istorya, gimartilyo ang agtang sa biktima rason sa na-angkon niining dili tiaw nga injury.
Daling gidala ang biktima sa Butuan Medical Center samtang gihimo usab ang hot pursuit operation nga miresulta sa pagkasikop sa suspek nga gikustudiya na sa kapulisan alang sa tukmang disposasyon.
