BUTUAN CITY – Nahimong duguon ang unta pag-serve lang sa search warrant batuk sa usa ka gitu-uhang drug pusher human kini misulay pagsukol sa raiding team kaganinang alas-9:30 sa buntag.
Naila ang subject person nga si Steven Paloma alyas Janno, 35-anyos ug mulupyo sa New Asia, Purok 10, Brgy. Fort Poyohon ning siyudad sa Butuan.
Sa inisyal nga impormasyon, pasulod na unta sa pinuy-anan ang mga pulis dihang gipabuthan sila niini rason nga ila kining gitiro.
Sigon ni Kapitan Archie Palad, ning tuiga lang nakagawas gikan sa Butuan City Jail ang suspek human napriso niadto pang tuig 2012 og nagtuo siyang nag-usab na kini. Wala na niya ma-monitor ang mga lihok niini tungod kay na-busy na sila sa ilang COVID-19 response sa ilang barangay.
Narekober sa crime scene ang mga basiyo sa 9mm nga pistola apil ang usa ka kalibre 38 nga revolver ug basiyo niini ingon man 11 ka sachets sa gidudahang shabu nga gibana-banang nagkantidad og sien-mil pesos uban sa nagkada-iyang drug paraphernalia.
