BUTUAN CITY – Padayon karun ang imbestigayon sa kapulisan sa pagpangatake sa riding-in-tandem diin ang biktima niini usa ka drayber sa dump truck nga nagbiyahe kaganinang alas 2:45 sa hapon sa SuperHighway sa may Barangay Lemon ning siyudad sa Butuan.
Naila ang biktima nga si Luisito Tim-ao, menyu, dunay 7 ka mga anak, lumad nga taga-Gingoog City apan kasamtangang nanimuyo sa Marcos Calo, Las Nieves sakop sa probinsiya sa Agusan Del Norte.
Puno sa graba ang gimanehoan sa biktima nga dump truck nga gikan sa Cabadbaran City og padulong unta sa Barangay Urduja apan pag-abot sa nahitaboan bisan ug nagdagan ang sakayanan kalit kining gipusil sa wala mailang suspetsado nga sakay sa single-motor gamit ang wala mailang klase sa armas.
Na-igo ang biktima sa ulo nga bahin samtang ang truck nahagbong sa basakan.
Sa pag-asuy sa helper nga si Joseph Tim-ao, 17-anyos nga pag-omangkon ra usab sa biktima, kalit nalang siya nakabati ug buto nga sa iyang pagtuo gikan lang sa mibuto nga ligid hangtud nga nahulog na sa basakan ang sakyanan.
Nakita pa niini nga gitiwasan ang biktima sa wala niini nailhang suspetsado adiser siya nawad-an og panimoot tungod sa kakuyaw nga gibati nga basin siya ang isunod sa pagpusil.
Sumala pa sa helper nga wala siya’y nabantayan nga dunay nagsunod-sunod kanila nga single motor dungan sa pagbutyag nga wala pud siya’y nailhan nga dunay naka-away ang iyang uyu-an.
Narekober sa ginsakpan sa Butuan City Police Station-1 ang gwantis nga gitoohang maoy gigamit sa suspek ug gilabay sa maong dapit human sa gihimung pagpamusil.
Apan negatibong nakuha sa otoridad ang mga basyo sa bala gikan sa armas nga gigamit sa mga responsable.
