BUTUAN CITY – Gihisgutan sa testimonya ni kanhi Commission on Audit kon COA state auditor Atty. Roderick Wamil, atol sa ika-onse ka adlaw nga impeachment trial batuk kang Vice President Sara Duterte, ang iyang obserbasyon sa Disbursement Voucher (DV) nga gi-isyu sa Office of the Vice President kon OVP niadtong December 20, 2022.
Sa maong disbursement voucher, makita nga ang ₱125 milyon nga cash advance alang sa confidential funds gisertipikahan nga necessary, lawful ug gi-incur ilalom sa direktang superbisyon sa head sa ahensya ug gi-aprubahan dayon alang sa pag-withdraw sa mao gihapong adlaw.
Dihang gikwenstyon ni House private prosecutor Lorna Kapunan, gipunting ni Wamil nga ang disbursement voucher, ang tseke, ug ang pagdawat o pag-encash sa tseke nahitabo tanan sa petsang December 20, 2022, nga maoy usa sa mga transaksyon nga gisusi sa audit.
Sumala sa iyang testimonya, ang COA adunay mga obserbasyon sa dokumentasyon ug nangayo pa og dugang supporting documents aron masusi kung ang paggamit sa confidential funds nakatuman ba sa mga rekisitos sa 2015 Joint Circular human nakita nga wala nay dugang supporting documents nga gisubmite gawas sa revised accomplishment report.
Gitumbok ni Atty. Roderick Wamil ang ikaduhang sentence sa Item 6.1.5 sa Joint Circular No. 2015-01 aron ipakita nganong, sa iyang pagtan-aw, dili compliant ang disbursement voucher sa OVP.
