BUTUAN CITY – Gipaneguro ni Department of the Interior and Local Government (DILG) Secretary Jonvic Remulla nga walay special treatment nga madawat si Senator Jinggoy Estrada ug uban pang akusado sa matud pa 537 milyones pesos nga flood control corruption scandal.
Sigon ni Remulla, miagi si Estrada sa parehong proseso nga gipatuman sa tanang mga tawong anaa sa kustodiya sa kapulisan lakip na ang booking procedures, fingerprinting, mugshots, ug medical examination.
Mahinumdumang giaresto si Estrada sulod sa Senado human gi-serve sa mga awtoridad ang warrant of arrest nga gipagawas sa Sandiganbayan mahitungod sa kasong plunder nga gipasaka sa Office of the Ombudsman.
Human gibasa ang iyang mga katungod ug mapasabot ang mga kaso batuk kanya sa presensya sa iyang abogado, gidala siya sa Criminal Investigation and Detection Group (CIDG) headquarters sa Camp Crame para sa tukmang proseso.
Samtang gibulgar ni Remulla nga nakabaton sila og panaglalis ni Senate President Alan Peter Cayetano samtang gihimo ang pag-aresto.
Sumala sa kalihim, gipamugos ni Cayetano nga dili dapat arestuhon ang usa ka senador sulod sa Senado ug dapat una kining pagawason sa dakbalay adiser ipatuman ang warrant.
Bisan paman gipamugos ni Remulla nga walay nagtunhay nga balaod nga nagbawal sa mga awtoridad nga mohimo og pag-aresto sulod sa Senado.
Human makumpleto ang mga kinahanglang proseso sa Camp Crame, giablhin si Estrada sa Sandiganbayan para sa mga musunod nga legal procedure mahitungod sa iyang kaso.
Kauban usab sa arrest warrant ang kanhe Department of Public Works and Highways (DPWH) Secretary Manuel Bonoan ug uban pang mga respondent sa kaso. Sigon sa DILG chief, ang tanang nalambigit na-account na sa mga awtoridad.
Gitumbok sa opisyal na ang desisyon mahitungod sa kustodiya ug detention arrangements sa mga akusado anaa sa kamot na sa Sandiganbayan.
