BUTUAN CITY – Gipaneguro ni Department of Agriculture (DA) Sec. Francisco Tiu Laurel Jr., ang hinanaling pagtubag sa pagsaka sa food inflation sa 6.1%.
Kung balikan ang nahiunang taho sa Philippine Statistices Authority (PSA), migawas nga mipaspas sa 6.1% ang food inflation niadtong Abril diin nakitang naka-apekto niini ang pagtaas sa presyo sa bugas, mais, isda, ug gulay.
Pasabot sa kalihim, bisan og bastante ang suplay sa pagkaon sa nasud, ang taas nga presyo sa produktong petrolyo ang nagtuklod sa pagtaas sa gastos sa transportasyon ug logistics, nga nakaapekto sa presyo sa mga palaliton.
Tungod niini, subling gibanhaw sa DA ang food lanes diin gitanggal ang toll fees para sa mga agri truckers ug giminusan usab ang port charges.
Gipalapdan usab sa DA chief ang market monitoring para malikayan ang hilabihan nga patong sa presyo, samtang padayon nga giduso ang mga programang sama sa Benteng Bigas ug Rice-for-All para sa mas baratong bugas.
Naka-andam usab ang PH government nga magpatuman og price cap nga P50 kada kilo sa imported rice kung magpadayon ang pagtaas sa presyo.
Sumala sa kalihim, gihimo sa DA ang tanang pamaagi aron mapakunhod ug mapahinay ang inflation sa pagkaon, dungan sa pagtabang sa mga maguuma nga patas-on ang ilang produksyon sa palay, mais, high value crops, ug uban pang agri products.
