BUTUAN CITY – Anaa na sa maayong kahimtang si Defense Secretary Delfin Lorenzana, human nalipong samtang mitambong sa programa sa ika-124th Independence Day kagahapong adlawa.
Sigon ni DND head Executive Assistant Peter Paul Galvez, stable na ang kahimtang sa kalihim ug kasamtangang nag-relax sa usa ka pribadong hospital.
Gitin-aw ni Galvez, nga wala nag collapse ang kalihim ug conscious kini. Samtang sumala usab ni DND Spokesperson Arsenio Andolong, base sa impormasyon nga gihatag kaniya, gusto sa kalihim nga mouli apan gipug-ngan siya sa mga doktor, tungod kay padayon pa ang gihimong obserbasyon kaniya.
Sumala ni Andolong, kalit nga naluya si Secretary Lorenzana ug nakuyapan. Bag-ohay lang miabot sa nasud ni Lorenzana kagahapon sa ala-1:00 sa kaadlawon gikan sa iyang biyahe sa abroad.
Gitin-aw usab ni Andolong nga wala pa si Pangulong Rodrigo Duterte dihang natigayon ang insidente.
