BUTUAN CITY – Gikwesyon sa House prosecution panel ang kalit nga pagbag-o sa posisyon sa kampo ni Bise Presidente Sara Duterte human mitugot ang depensa nga ablihan ang selyadong kahon sa mga dokumento gikan sa Bureau of Internal Revenue (BIR) alang sa umaabot nga impeachment trial.
Sumala sa House proseuction spokesperson Zia Alonto Adiong, bisan pa man nga maayo kini nga lakang aron mulihok ang kaso, makatingala gihapon alang kanila nganong karon pa lang misugot ang depensa taliwa nga natapos na ang pre-trial conference.
Madumdumang kusganong gisupak sa mga abogado sa bise presidente ang pagmarka pa lang sa gawas sa maong kahon sa mi-aging pagdungog.
Nakabalak-an usab ni Adiong ang hangyo sa depensa nga maghimo pa og laing executive session alang lang sa pag-abli ug pagmarka sa BIR box.
Pahimangno sa magbabalaod, mahimo lang kini nga hinungdan sa laing pagkalangay sa pagpagawas sa pre-trial order ug sa pormal nga pagsugod sa pagtaral.
Gipasabot ni Adiong nga ang pag-abli ug pagmarka sa mga dokumento, wala nagpasabot nga madawat kini dayon isip ebidensya kay ang Senate impeachment court gihapon ang magbuot niini sa mismong trial.
Nanawagan ang prosekusyon nga undangon na ang lain‑laing ligal nga palusot aron makapokus na ang tanan sa pagpresentar sa mga ebidensya ug mga testigo sa umalabot nga Hulyo 6.
