BUTUAN CITY – Nag-isyu na og show cause order ang Cooperative Development Authority kon CDA-Caraga ngadto sa Diamond Transport Service Cooperative kon DATSCO human niini gisibog ang una na nilang nasabutang pagpahigayon og general assembly ugmang adlawa, Miyerkules, Agusto 25.
Sa eksklusibong pakighinabi sa Bombo Radyo Butuan, gipadayag sa kanhi accounting head ug regular member sa DATSCO nga si Romeo Ednilan, nga aksyon kini sa CDA tungod sa klarong paglikay na matud pa sa management sa kooperatiba pagpanguna ni chairman Evangelus ‘Evans’ Lawenko nga himuon kini taliwa nga kini unta ang pinaka-una sa lima ka giplanuhang asembliya kansa pulos wala madayon tungod kay kanunay lang isibog.
Sigon ni Ednilan, kung dili matud pa mutambong sa asembliya ugmang adlawa ang ilang mga Board of Directors, magpagawas usab og desisyon ang CDA aron iklaro nga dili na pwedeng magpatawag og general assembly ang ilang BOD uban kang Lawenko ug mismong ang ahensya na ang mupatawag niini o kaha ang ilang grupo ubos sa pag-apruba usab sa CDA.
Nasayrang inay nga general assembly, ang gihimo sa kadumalahan ni Lawenko, nagtakda na hinuon kini og tulo ka sequential assembly sa managlahing lugar gikan sa Agusto 29, 30 ug 31 kansa mas gasto ug mas hago gawas nga makaya ra sa usa ka venue ang 159 ka mga membrong mutambong niini.
Sigon ni Ednilan, wala kini dawata sa CDA sa rasong dili kini ang nasabutan nila atol sa ilang tigom niadtong Agusto 12 uban sa mga opisyal sa Land Transportation, Franchising and Regulatory Board kon LTFRB-Caraga.
Dugang pa ni Ednilan, wala matud pa magpadala og notisya si Lawenko ngadto sa 159 nila ka mga membro aron unta mutambong sa asembliya ugmang adlawa.
Pwede matud pa silang magpahigayon og eleksyon sa ilang grupo apan sayod silang ilegal gihapon kini rason nga maghulat na lang sila sa sunod nga lakang nga himuon sa CDA.
